Avo Maria Hela Deit Iha Fatuk Kuak Durante Tinan 10 Ona, Espera Bele Hetan Tulun Husi Ema Laran Luak

RCS-Bucoli, 17-07-2025-Avo Maria da Costa ho idade tinan 63 deside hela mesak deit iha fatuk kuak iha area Badunau Aldeia Lulihene suku Bucoli Postu Baucau, Munisipiu Baucau, hahú tinan 2015 too ohin loron.

Ba Jornalista Rádio Coulelemai Sahe Bucoli Avo Maria konta, Nia hola mane ema husi Suku Bahu no kous oan mane nain 2, wainhira nia kaben mate, nia deside mai hela ho nia maun iha área Badunau Bucoli no wainhira nia maun mate nia deside hela mesak iha fatuk kuak ida ho nia medida luan kuaze metro 2, fatuk kuak ne mak sai hanesan mahon ba nia hodi satan, udan, anin, mahowen no loron nia manas.

” hau iha ne’e hela mesak deit, kuaze tinan 9 ou 10 ona hanesan ne’e, iha ne’e la iha ema laran at ou animal Fuik ruma mak mai ameasa hau, iha ne’e wainhira hau nia fos la iha hau ba ke’e kumbili ruma mai daan ka tunu hau han ne’e toba ona. Hau mai iha ne’e 2015, hau mai husu toos ba alin mane ne’e hodi fo toos ne’e ba hau atu halo no hela deit iha ne’e. Hau mak deside atu mai hela mesak duni iha ne’e tamba hau la gosta atu kria problema ho família seluk.” Avo Maria konta iha lian materna Uai-mua.

Avo Maria hatutan Autoridade lokal Bucoli liu husi Xefe Aldeia Lulihene, Xefe Juventude Bucoli, no ekipa husi Banco Nacional Comercio Timor-Leste(BNCTL) Sukursal Baucau mos to’o ona iha fatin nebá hodi hare direita Avo Maria nia kondisaun.

Jacinto Belo alin husi Avo Maria informa katak, horseik Autoridade lokal Bucoli no ekipa BNCTL Baucau too duni iha fatin ne’e no husu família atu fasilita rai oituan para bele hari uma

” Hau fó, hau ho hau nia alin Agostinho deit ne’ebé hau fó, Hau husu para nia hela metin, nia família hare la diak ami simu nia, nia mate ami hakoi diak.” Dehan Jacinto Belo

Avo Maria ho hammasa no oin ne’ebé nakonu ho esperansa katak sei iha ema laran luak balun ne’ebé iha tempu besik bele tulun nia.

” ema fo mai hau simu, halo diak tiha ba hau ba hela iha laran.” Nia hatutan ho hammasa

Antes Notisia ne’e fó sai, seidauk hetan komfirmasaun husi Autoridade Lokál Bucoli tamba la iha fatin. Avo Maria iha oan mane nain 2, mane boot kaben ona no mane kiik hela ho nia tiu sira.

Avo Maria oras ne’e dadaun atinji ona idade 63 maibé sedauk hetan nia direitu nudar benifisiariu idozu tamba dokumentus balun la kompletu.

Antes ne’e Avo Maria mos hetan vizita husi ekipa pessoal Centru Saúde Bucoli hodi hetan vasina no konsulta.

Ekipa Kobertura RCSB