VPU Baucau Sensibiliza Informasaun Lei Kontra VD ba Komunidade Triloca

RCS-Bucoli, 22-07-2025— Inspétor Asistente Xefe VPU Munisípiu Baucau hamutuk ho Komandante PNTL Eskuadra Baucau sensibiliza Informasaun Lei Kontra Violensia Doméstika (VD) ba Komunidade Triloca hodi fahe informasaun ba Komunidade sira atu iha koñesimentu Báziku hodi bele keixa wainhira hetan krimi Violensia Doméstika.

Inspétor Asistente Xefe VPU Munisípiu Baucau Madalena Ximenes Freitas hateten importansia husi sensibilizasaun ne’e atu Komunidade sira bele iha koñesimentu katak krimi violensia doméstika nia natureza mak krimi públiku labele rezolve tuir familia maibe hato’o keixa ba Polisia

” Sensibilizasaun ida ohin ne’e importante tebes atu nune’e ita-nia Komunidade sira bele hatene bele iha koñesimentu ne’ebé diak katak krimi violensia doméstika nia natureza krimi públiku labele rezolve tuir Familia maibe tenki hato’o keixa ba polisia atu nune’e bele prosesa kontinuasaun ba Ministériu Públiku no atu hato’o mos lei kontra violensia doméstika polisia mos iha papel importante atu bele dezanima lei ne’e”. Dehan Inspétor Asistente Xefe VPU Baucau Madalena Ximenes

Iha fatin hanesan Xefe Suku Triloca Reinaldo Nicolau da Silva akresenta violensia doméstika ho númeru ne’ebé aas iha Triloca vítima balun halo keixa no parte Autoridade Lokál informa kedas ba VPU agora dadaun sei halo akonsellamentu.

” Kazu violensia dométika nia númeru sa’e oituan iha Suku Triloca hau hakarak konvida parte relevante atu divulga informasaun ba Komunidade nune’e ba oin bele reduz no balun mai keixa balun ami haree ho matan ami informa kedas ba parte polisia no VPU mai foti sira agora dadaun halo hela akonsellamentu ba vítima sira”. Informa Xefe Suku Triloca

Iha Sorin Seluk Jovem Elisio Freitas enkoraja Komunidade Triloca liu-liu Inan-Aman sira hetan krimi labele tauk atu keixa.

” Violensia sempre akontese iha familia tamba ne’e husu ba Inan-Aman sira karik akontese problema labele tauk atu keixa, dalan mak lou husi Autoridade lokál sira”. Hateten Elisio Freitas

Entretanto Atividade Sensibilizasaun Lei Kontra Violensia Doméstika hala’o durante loron ida, ne’ebé Partilla husi Xefe VPU Baucau, Komandante PNTL Eskuadra Baucau, Reprezentante APA Baucau no Xefe DNPKK Baucau.

Ekipa Kobertura RCSB