Finadu signifika Uniaun entre Maromak, Ema no Matebian

RCS-Bucoli, 02-11-2024, Lia fuan murak ne’e hato’o husi Amo selebrante Pé. Fernando José Belo Iha nia homília ba sarani sira wainhira selebra misa loron Matebian nian iha igreja Nossa Senhora Imaculada Conceição Bucoli.

Amo Fernando hateten ohin ita selebra loron matebian sira nian, loron ida ne’e fo hanoin mai ita kona-ba uniaun, katak Maromak hakarak ita ba hamutuk ho nia.

‘’ Maromak nia lia fuan ohin hateten ‘’mai hamutuk ho hau imi sira be kolen no susan tan hau sei hakmaan imi nia kolen hotu’’ lia fuan ne’e fo hanoin mai ita katak uniaun ( Persatuan) katak Maromak hakarak it aba hamutuk ho nia, ne serteja loron ida ita sei ba hamutuk ho nia, ohin ita selebra loron matebian sira nian, tamba sira mate ona, ba ona hamutuk ho Maromak iha nia kadunan Santu, ita reza ba sira, atu Maromak bolu sira hodi hetan maksoin. Maromak sei fo kmaan ba ita no konvida atu ba hamutuk ho Nia,ohin ita selebra loron matebian nian, ita reza ba sira to’o tempu ida Maromak bolu ita, ema seluk sei reza ba ita, ne’e hateten katak uniaun entre Maromak ho ita no ita ho matebian sira.’’ Dehan amo Fernando.

Amo selebrante ne’e hatutan uniaun entre Maromak, ema no matebian ne’e atravez husi orasaun, eukariastia no hahalok ne’ebe mak diak, ba hamos sira nia rate, reza misa ba sira, sunu lilin no tau ai-funan.

Iha misa ne’e hetan partisipasaun maioria husi sarani Bucoli, selebrasaun loron matebian 02 novembru 2025 iha Bucoli la’o hakmatek tamba hetan seguransa husi PNTL munisipiu Baucau. 

Ekipa Kobertura RCSB.