RCS-Bucoli-24-11-2024,—Xefe Centru Saúde(CS) Bucoli hamutuk ho ekipa hahu ona halo preparasaun ba esar bandeira iha eventu komemorasaun loron proklamasaun Independensia Timor-Leste ba dala 50 iha sede suku Bucoli.
Xefe Centru Saúde (CS) Bucoli Diogo do Rosário Parada espresa nia sentimentu katak Nia sente kontenti no orgullu tamba bele hetan fiar husi autoridade lokál suku Bucoli hodi organiza eventu importante ida ne’e.
Nia hateten lia hirak ne’e wainhira dadalia ho jornalista Radio Bucoli iha nia knaar fatin, kona-ba preparasaun esar da bandeira ne’ebe responsabiliza husi ekipa CS-Bucoli.
‘’ diak, hau agradese tamba ita nia autoridade suku bele fo fiar ba ami, durante 10 anos ami destaka iha CS- Bucoli foin primeira vez, autoridade suku fo fiar ba ami atu organiza eventu ida ne’e, ami orgullu no kontente tebes tamba autoridade suku koopera diak ho ami.’’ Dehan xefe CS-Bucoli
Nia hatutan maske hasoru difikuldade durante preparasaun, maibe nia garante katak eventu ne’e sei lao ho susesu.
‘’ konserteza sei mosu difikuldade maibe ami buka meius kordena ho autoridade suku. Hau garante eventu ida sei la’o ho susesu tamba ne’e laos ami CS-Bucoli deit maibe sei hamutuk ho autoridade suku no veteranu ho komunidade sira.’ Nia hatutan
Xefe suku Bucoli Teresinha de Jesus dos Reis iha entrevista relasiona ho preparasaun ne’e hateten, eventu komemorasaun 28 novembru entrega ona ba ekipa CS-Bucoli mak organiza maibe autoridade lokal Bucoli nafatin apoiu.
‘’ agora dadaun 28 novembru ne’e ami entrega ba ita nia Centru Saude Bucoli, buat hotu ami entrega ba sira, esar da bandeira mos entrega ba sira, komando jeral no protokolu mos entrega ba sira, iha ne’e ami tama deit ba inspector jeral, ne’e ba iha veteranus ida.’’ Dehan Xefe Suku Bucoli.
Ekipa esar da Bandeira husi CS-Bucoli hahú ona treinu marsa, hasa’e bandeira no hananu hino nasionál Patria-Patria hamutuk ho Estudantes Estajiarius husi UNTL ne’ebé halo estájiu iha Bucoli.
Ekipa Kobertura RCSB
Leave a Reply