Rcs-Bucoli, 19-11-2025—Autoridade Munisipal (AM) Baucau kuarta-feira ne’e hala’o sorumutu Konsulta publiku ho Sosiedade Sivil, parseiru dezenvolvimentu no grupu intelektual sira iha Baucau hodi koalia konaba planu dezenvolvimentu Munisipal(PDM) ba tinan 2025-2030
Remata abertura Sekretaria Munisipal asuntu sosiais no Organizasaun komunitaria Maria Celestina Viegas ba jornalista sira relata, Autoridade Munisipal Baucau realiza konsulta publiku ne’e hodi husu hanoin husi parte hotu konaba Dezenvolvimentu nebe sei hala’o iha Munisipiu Baucau ba tinan 2025-2030, liu-liu kona-ba area haat hanesan, setor Saúde, Edukasaun, infraestrutura, ekonomia no institusional.
“Konsultasaun públiku ida ne’e relasiona ho ita nia planu estratéjiku munisipal nian ne’ebé kada tinan 5 ita halo revizaun ba buat saida mak ita relaliza ona no ida ne’ebé mak seidauk relaiza, ita hahù iha tinan 2019 too 2023, iha Programa lubuk ida ita hala’o ona, entaun ba fali tinan 2025-2030 ne’e ita presija hare fila fali, atu husu parte hotu-hotu ninia hanoin, oinsá atu halao dezenvolvimentu iha ita nia munisipiu Baucau.” Dehan Maria Celestina
Enkuantu Iha abertura Diretor Ajensia Planeamentu Francisco Xavier Guterres husu Sosiedade Sivil, parseiru dezenvolvimentu no grupu intelektual sira atu iha konsultasaun publiku ne’e identifika nesesidade nebe infrenta iha instituisaun ida-idak kada setor, nune’e tau ba planu iha tinan 2025-2030
” husu ba ita hotu, saida deit mak sai nesesudade iha instituisaun ida-idak, iha prosesu diskusaun orsda, problema mak ne’e identifika deit, prosesu formulasaun ba lia fuan, hakerek livru ne’ebé ekipa elaboratoriu mak sei hakerek, ami halo konsulta iha loron kalan sei hakerek, tamba ne’e mak hau husu ba maluk sira atu fo ninia nesesidade ne’ebé infrenta iha instituisaun ida-idak, mai ita tau tuir nia setor, setor sosial, ekomia, infraestrutura no setor dezenvolvimentu Institusinál.
Diretor ne’e informa, prosesu konsultasaun publiku ne’e laos deit sai materia planu asaun anual ba Autoridade Munisipal, maibe sei aprova iha Konsellu Ministru no publika iha jornal da Republika.
Alende ne’e Diretora Assosiasaun Unidade Feto ba Dezenvolvimentu(AUFD) Bendita de Jesus Amaral akresenta, nudar Organizasaun Feto iha Baucau sente triste hare kondisaun estrada urbana iha Baucau nafatin at no fo impaktu tebes ba komunidade sira atu asesu.
“Bazeia ba ita nia Observasaun, laos ita observa deit maibé ita mos sai benifisiariu, tamba ita nudar komunidade husi Munisipiu Baucau, ita hare situasaun iha ita nia munisipiu ne’e rasik liu-liu iha ita nia estrada ne’ebé fo impaktu tebes ba ita nia komunidade atu asesu, nudar Organizasaun Feto sente triste wainhira hare ita nia estrada kondisaun hanesan ne’e nafatin.” Dehan Bendita.
Entertantu partisipa iha konsulta publiku ne’e, Sosiedade Sivil, parseiru dezenvolvimentu, Ema ho kondisaun espesial no Asosiasaun feto iha Munisipiu Baucau.
Ekipa Kobertura RCSB
Leave a Reply