Autoridade Lokal Bucoli Halo Resensiamentu Populasaun 2025

RCS-Bucoli, 01-07-2025, Autoridade lokal suku Bucoli hahú iha loron 23-06-2025 halo resensiamentu ba populasaun Bucoli hodi re-atualiza dadus komunidade nian ne’ebe antes ne’e halo ona resensiamentu iha tinan 2010.

Xefe aldeia Lulihene Jaime da Silva hanesan mos Xefe suku Interino iha entrevista hateten ficha Família ne’ebe autoridade lokal sira rejista iha tinan 2010, ou tinan 15 liu ba la kondis ona ho kondisaun agora, liu-liu iha abilitasaun literaria.

“Rejistu populasaun iha tinan 2010, atu halo re-ajustamentu ou re-atualizasaun, populasaun iha Bucoli nafatin sira iha ne’e ka lae, tamba ficha familia ne’ebe ami rejista iha tinan 2010, liu-liu kona-ba sira nia abilitasaun literaria la kondis ho tinan 15 ne’ebe liu ba kotuk, tamba ne’e mak hakarak ka lakohi ami tenki halo fali re-ajustamentu, wainhira ami inisia ho arolamementu ida ne’e balun iha eskola primaria, balun pre-secundaria, balun iha secundaria, maibe kondisaun to’o agora ne’e balun iha ona ensinu superior. Tamba ne’e mak hakarak ka lakohi ami halo fali resensiamentu populasaun 2025 atu identifika lolos dadus sidadaun Bucoli nian.’’ Dehan Xefe aldeia Luliheni

Nia hatutan iha resensiamentu ne’e foti mos dadus kona-ba, komuidade nia animal, plantasaun, saneamentu, be mos, eletrisidade, kondisaun uma no rai.

“ re-ajustamentu ida ne’e laos foka ba populasaun deit, maibe ami mos rejista kona-ba Plantasoens, kondisaun uma ne’e oinsa, ema nia profisaun, nia iha sentina ka lae, be mos iha ka lae, eletrisidade no liu-liu kona ba rai, rai privadu no rai doasaun.’’ Nia hatutan

Resensiamentu ne’e hala’o iha sede suku Bucoli, Dokumentus ne’ebe presija lori mak hanesan,xefe familia prepara foto koloridu 3×4 tahan 2, ficha familia tuan, kartaun eleitoral xefe familian no menbru familia ne’ebe karik iha ona, sertudaun batismo, sertidaun RDTL no BI karaik iha ona, iha resensiamentu ne’e sei permite deit xefe familia mak bele ba rejista no sei la rejista wainhira ema seluk mak lori dokumentus ba.

To’o oras ne’e dadaun xefe familia hamutuk atus 1 resin mak tuir ona Rejistu. Totál xefe Família iha Bucoli iha tinan 2025 hamutuk 780, mane 1.670 no feto 1.717.