Joven uluk oferese an ba mate tamba hakarak moris livre

RCS-Bucoli, 12-11-2025—Autoridade Munisipal Baucau hamutuk ho Juventude no estudantes realiza misa agradesimentu iha igreja Catedral Baucau hodi komemora loron nasional Masakre santa cruz 12 Novembru 1991 ba dala 34.

Iha misa agradesimentu ne’e Amu selebrante Pe.Canizio SDB. iha nia umilia hateten, joven sira nebe mate iha tinan 34 liu ba no sakrifika sira nia aan ho objektivu ida deit, atu bele moris livre hanesan nasaun ida ho dignu.

 ‘’ Jovem sira ne’ebé mate iha tinan tolu nulu liu bá, la tauk atu fó sira nia aan hodi sakrifika sira nia vida hateke ba futuru relevante ho objetivu ida deit atu it abele moris livre hanesan país ida, asaun sira ne’ebe Jovem sira halo iha tempu uluk sai nu’udar manifestasaun sira nian ba dedikasaun ba rai ida ne’e, tamba domin no dedikasaun ba rai ida ne’e vertude no dignidade sira halo risku ba sira nia aan no buat ne’ebé sira tau iha sira nia hamoin malk ne’e Timor tenki livre, Timor lakohi tan okupasaun, violensia Timor hakarak atu kria paz, domin no estabilidade mesmo ke fakar isin no raan’’. Dehan Amu selebrante Pe. Canizio

Hafoin remata misa,Prezidente Autoridade Munisipiu Baucau Veneranda Lemos Martins akresenta,ema hotu tenke hamutuk hodi reza no harohan ba erois no juventude loriku asuwain nebe durante tinan 34 liuba ho aten brani fo an ba mate tamba hakarak ukun rasik an.

‘’ Ita hamutuk reza, harohan ba ita-nia maluk matebean sira, Heróis no Heróina sira liu-liu Jovem Loriku Asuwa’in ne’ebé tinan tolu nulu resin haat liu bá ho brani teb-tebes iha Semitériu Santa-Cruz la fihir ba povu, la fihir ba nia feto ka mane, la fihir ba grupu maibe hotu-hotu ho brani hodi harii hatene mate no moris no ukun rasik aan, ohin ita kontinua sira nia luta, hanesan Jovem hanesan Estudantes, ita-nia papel mak, ita-nia konviksaun katak ukun tenki kontinua, ita sei kontinua sira ne’ebé ohin hateten mate ka moris mak dezenvolvimentu’’. Informa Prezidente Autoridade Munisipiu Baucau Veneranda Lemos Martins

Prezidente Autoridade Munisipiu Baucau ne’e apela ba joven no estudante sira atu nafatin kontinua ispiritu luta no mehi nebe asuwain sira husik hela,no sente katak joven ida agora nudar kontinuador

Enkuantu, remata misa agradesimentu Autoridade Munisipal Baucau hamutuk ho juventude no estudantes sira lori aifunan marsa husi igreja katedral Baucau hodi ba kari iha semiteriu Tirilolo Baucau hafoin fahe malu.

Ekipa Kobertura RCSB