AM Baucau Realiza Misa Agradesimentu Hodi Komemora Timor-Leste Adere ba ASEAN

RCS-Bucoli, 25-10-2025—Autoridade Munisipal (AM) Baucau Sábadu Fim de Semana ne’e selebra misa agradesimentu iha Igreja Parókia Santo António Vila-Antiga Baucau hodi komemora adezaun Timor-Leste ba ASEAN.

Iha misa Agradesimentu ne’e amo selebrante Pé Adérito Victor da Costa iha homilia hateten Timor aon tenke produz matenek naín barak hodi bele hamriik metin no lao ba oin.

” Iha faru ne’ebé imi hatais ne’e dehan TOGETHER WE RISE, ne’e katak hamriik metin la’o ba oin hamutuk la’o ba oin, atu la’o ba oin tenki iha uniaun no fraternidade, se ita ida-idak halo ninian, los ita bele la’o maibé ita halai tuir duni la toman, ita hamutuk ho nasaun viziñu sira ita hare katak ita mos bele, ita kopia la iha buat ida, ita tenki produz Timor oan matenek nain barak iha, hanesan matenek naín sira dehan Edukasaun ne’e tulang pungun, se edukasaun ne’e la forte ou Fraku ne’e dezafiu boot ba ita hotu, agora ita tenki prepara didiak ita nia Jerasaun foun sira.” Dehan Amo selebrante 

Hafoin remata misa Komisaun Organizador ba loron Nasionál husi Autoridade Munisipal Baucau Eduardo Filipe Xemenés hateten Timor-Leste sai adere ona ba membru ASEAN, tamba ne’e tenke prepara aan.

“Ohin dader ita hasoru malu iha ne’e atu halo misa agradesimentu ba Aman Maromak ne’ebé ho nia tulun no grasa Timor ita adere ba membru ASEAN, hanesan Timor oan ita agradese maibé hanesan ohin iha homilia amu dehan ona katak ita tenki prepara an tamba ita sai ona membru ASEAN, nain sira akompaña karik rejolusaun lubuk ida mak ita nia parlamentu nasionál ratifika nune’e mos Rezolusaun governu ita Timor nakloke ba membru ASEAN nasaun 10 ne’e, tamba ne’e ita tenki prepara an.” Dehan 

Assosiasaun Nasaun Sudueste Aziatíku (ASEAN) hari’i iha loron 8 agustu 1967, ho nia membru nasaun mak hanesan, Indonésia, Malásia, Filipina, Singapura, Thailand, Brunei Darusalam, Vietnam, Laos Myanmar no Kambodia, Nune’e mos iha loron 26 fulan outubru 2025, iha simeria ASEAN nian ba dala 47 iha Kuala-Lumpur Malásia, Timor-Leste ofialmemte sai nudar membru ASEAN ba dala-11.

Ekipa Kobertura RCSB