EBF Ostiko la iha eskritoriu ba Professores no Saneamentu

RCS-Bucoli, 23-10-2025—Koordenadora Eskola Baziku Filial(EBF) Ostiku Cecilia Albertina da Costa kinta-feira ne’e iha serbisu Fatin hateten, difikuldade nebe dadaun ne’e EBF Ostiku infrenta mak, falta Professores, faiha eskritoriu ba Professores sira, Saneamentu, nomos sala de aula 3 mak kondisaun aat.

Koordenadora ne’e husu ba Governu liu husi ministériu Edukasaun atu bele hadia sira nia sala de aula 3 nebe mak aat, nomos aumenta tan manorin, nune’e estudantes nebe barak bele fahe ba sala A no B, atu nune’e manorin sira bele hanorin no kontrola ho diak.

‘’ Sala ne’e mak ita bele dehan sufisiente maibe falta manorin tamba estudantes sala ida balun neen nulu resin tolu, balun lima nulu no balun haat nulu resin lima karik manorin aumentan entaun ami fahe tiha kada klase ida sira ne’ebé dadus alunus barak liu ne’e ami tenke fahe ba parte A no B atu nune’e Manorin fasil bele kontrola Estudantes sira maibe komu ami nia Manorin la to’o depois ami nia sala tolu ne’e aat hela seidauk hadi’a plafon sira mos aat hotu ona, pois ajuda husi parte balun, ne’e para hadi’a ami nia eskola, ami nia eskola kuandu diak presija Manorin iha tan entaun ami bele fahe alunus barak bele fahe ba A no B, atu nune’e Manorin sira hanorin sira ho diak, hau hakarak atu hadi’a ami nia edifisiu sala tolu ne’ebé aat ho tan saneamentu ba Manorin no Estudantes laiha, Eskritóriu ba Professor sira mos laiha, hau presija liu mak ida ne’e’’. Dehan Koordenadora Eskola Baziku Filial (EBF) Ostiku Cecilia Albertina da Costa

Responsavel EBF Ostiko ne’e afirma, tinan barak ona sira halo serbisu,maibe eskritoriu ba sira laiha, dadaun ne’e sira uza deit sala de aula pre-eskolar nian nudar eskritoriu.

‘’ Tinan barak ona ami servisu iha ne’e maibe eskritoriu ba Manorin sira mak laiha, ami halai ba mai deit, haree fatin ida ne’ebé seguru ka iha sala de aula iha entaun ami uja netik baa mi nia eskritóriu agora dadaun ne’ebé ami uja ne’e Pré-eskolar nian, meja, kadeira ba Manorin nian laiha, ida ne’e ami uja Estudantes sira nian ne’e ma kami foti mai tau iha ne’e ami uja, ami mos sosa meja kadeira balun laos sosa hotu kedas’’. Nia Hatutan

Koordenadora ne’e relata, kadera meza ba manorin sira mos laiha,obriga sira uza deit estudantes sira nian nomos seguransa eskola la iha, maske nune’e prosesu aprendijiajem iha eskola refere la’o normal. 

Observasaun jornalista RCSB,EBF Ostiko iha sala de aula 3 mak la uza tamba Kondisaun att, nomos plafon sira balun komesa monu.

Enkuantu, EBF Ostiko dadaun ne’e akumula estudantes hamutuk 239, kompostu husi pre-eskolar to’o Primeiru no segundu siklu, ho manorin nain 9.

Ekipa Kobertura RCSB