MCI Baucau realiza Enkontru ho Administrador Postu Sira hodi deskute kona-ba Programa P1P1

RCS-Bucoli, 29-07-2025— Ministériu Comersiu no Industria (MCI) Munisípiu Baucau liu husi Diresaun Nasional Perkiza no Estatística Baucau realiza Enkontru ho Administrador Postu 8 iha Baucau ho Diretóres liñas ministeriais sira hodi deskute kona-ba Programa Postu Ida Produtu Ida (P1P1) iha Salaun Apurramentu Munisipál Baucau. 

Maria Lúcia Trindade Diretora Nasional Perkiza no Estatística MCI hateten iha Programa nonu governu konstituisional nian fanun ita oinsá atu identifika ita nia produtu potensiál atu nune’e bele reduz importasaun.

” Objetivu husi enkontru ne’e oinsá ita atu identifika no aprejenta konseitu Postu ida produtu ida, oinsá ita atu identifika produtu potensiál, produtu ne’ebe kategoria úniku iha kada postu atu nune’e oinsá ita bele dezemvolve hodi nune’e bele asesu ba merkadu Nasionál no global.” Dehan Diretóra

Nia hatutan iha Postu balun iha produtu potensiál liu 2, maibé sei identifika produtu ida deit ho kriteria hanesan produtu refere garante nia kualidade, kuantidade no kontinualidade.

Administradora Postu Vemasse Elda M.V de Sousa Feitas hateten aseita ho planu governu nian ne’e, tamba bele kobre produtu hotu-hotu iha postu ida, maibé husu atu identifika uluk produtu tamba komunidade sira maiória kuda produtu ruma tuir nia tempu. 

” Aseita tebes tamba programa ne furak, iha kolia Postu ida produtu ida ne’e akumula ona produtu hotu-hotu iha ita nia postu, maibe ita tenki identifika tamba kada suku mai ho ninia produtu rasik, maibé ita mos hare katak ita nia komunidade sira ne’e bai-bain sira halo produtu ne’ebe mak sesional katak depende ba situasaun deit, sira hare ba merkadu produtu ida ne’e mak folin liu entaun sira halo mak ida ne’e, maibe ita espera katak ho programa ida ne’e bele difini ona produtu ida ne’e husi suku ida ne’e entaun ita bele fokus ona ba produtu ne’e.”Dehan Administradora 

Partisipa iha Enkontru nee, Reprezentante PAM Baucau, Xefe departementu Seguransa alimentar, Administrador husi postu Administrativo 8 iha Baucau, no Diretor husi liñas ministeriais ne’ebe relevante ho programa refere. 

Ekipa Kobertura RCSB