RCS-Bucoli, 24-07-2025—Ho Publikasaun iha Média sosial husi pájina Ofisial Facebook Rádio Coulelemai Sahe Bucoli, iha loron 17-07-2025 Kona-ba Avo Maria da Costa ne’ebé hela deit iha fatuk kuak iha area Badunau Aldeia Luli-Heni suku Bucoli Postu Baucau Munisípiu Baucau durante tinan 10 nian laran.
Ho publikasaun Notisia ne’e hetan kedas atensaun máximu husi Prezidente da Repúblika (PR) Dr. José Ramos-Horta hodi orienta kedas Asesór Asuntu Sosial PR Quintiliano Monis Carvalho ho ekipa hodi vizita direta atu hare kondisaun, no iha tempu besik sei hari uma dignu ida ba Avo Maria tamba kondisaun vulneravel tebes.
” Uma ne’e hau bele hateten, tamba ita iha prosesu Administrasaun tarde liu fulan 2, fulan 2 ne’e tarde liu ona, lae la to’o. kona-ba konstrusaun uma ne’e nia laos hanesan projectu no la hanesan mos uma UKL ne’ebé sei loke nia prosesu aprovizionamentu, prosesu ida ne’ebé apoiu hetan uma dignu husi nai Prezidente da Repúblika ne’e hanesan asaun karitativa ida, Prezidente tau material, tau hahan, servisu husi komunidade no joven sira, ho ekipa husi prezidensia ita halo asaun karitativa ida hodi hari netik mahon ida, hodi hasai ita nia inan ne husi fatuk kuak.” Dehan Asesór Quintiliano.
Xefe Aldeia Lulihene Jaíme da Silva Agradese ba PR liu husi Asesór Asuntu Sosial ne’ebé bele to’o iha fatin hodi hare direita Avo Maria nia kondisaun.
Xefe Aldeia ne’e hatutan karik iha duni apoiu uma dignu husi PR, Autoridade lokal Bucoli sei organiza no mobiliza komunidade iha Aldeia refere hodi apoiu servisu.
” Hau lori Xefe Suku no Konsellu suku tomak nia naran hakarak Agradese ba Nai Prezidente i nafatin ami hein katak bele hetan sei hetan tulun husi nai Prezidente atu bele halo uma dignu uma ba nia, ida ne’e mak ami nia esperansa.” Dehan Xefe aldeia Lulihene.
Avo Maria sente kontenti tamba bele hetan oan tulun husi Prezidente da Repúblika
” Hau kontenti, uma ne mak prontu, hau prontu ba hela iha laran hau la hela ona iha fatuk kuak ida ne’e. ” Dehan Avo Maria
Orsamentu ne’ebé sei Apoiu hodi hari uma dignu ba Avo Maria mai husi Fundus Transferensia Públika.
Ekipa Servisu Sosiedade Sivil no Asuntu Sosial husi Prezidensia Repúblika ne’e mos oferese aihan bázika ba Avo Maria hanesan Fos, mina, manu tolun, roupa, no sabaun haris nian, atu aguenta nia moris hodi hein apoiu uma dignu ne’ebé promete husi Prezidénsia Repúblika ne’ebé sei realiza iha tempu besik.
Ekipa Kobertura RCSB
Leave a Reply